ಪ್ರೇಮದ ಕಾಣಿಕೆ

ಬಟ್ಟ ಬಯಲಿನ ಬರಡು ಬದುಕಲಿ
ದಿಟ್ಟ ನಡೆಯಿಟ್ಟು ಎನ್ನೆದೆಯ
ಮೆಟ್ಟಿಲೇರಿದ ಎನ್ನ ಪಟ್ಟದರಸಿ
ಬಳಲಿ ಬೆಂಡಾದಾಗ ನಿನ್ನುಸಿರ
ಗಾಳಿಯ ಬೀಸಿ ತಂಪನೆರೆವ
ಮುಂಗಾರು ಮಾರುತ

ಎನ್ನ ಅಕಾಲಿಕ ಅಸಹನೆಯ
ತೊಳೆದೋಡಿಸುವ ಸಹನಾ ನದಿ
ತಳಮಳಗಳ ತಣಿಸುವ ತಪೋನಿಧಿ
ಕಷ್ಟ ಕಾರ್ಪಣ್ಯಗಳ ಆಪೋಶನ ಮಾಡುವ
ಶಾಂತ ಕರುಣಾ ಸಾಗರ

ಪಟಪಟನೆ ಬಡಿದಾಡುವ ಹೃದಯ ಮಿಡಿತದಿ
ಮಿಳಿತಗೊಂಡ ನಿನ್ನುಸಿರ ಹೆಸರ
ಕಡೆಗಣಿಸಿದಲ್ಲೇ ಎನ್ನ ಕಡೆಗಾಲ
ಮರೆತಾಗ ಅಡಗಲಿ ನನ್ನುಸಿರು

ಇಗೋ ನನ್ನ ಪ್ರೇಮದ ಕಾಣಿಕೆ
ಧಿಕ್ಕರಿಸದೆ, ಕೆಕ್ಕೆರಿಸಿದೆ
ಒಪ್ಪಿಸಿಕೋ ನನ್ನುಸಿರೊಡತಿ